
Bir gün özüňi düýbünden nätanyş toprakda, aýagyňda gandal, öňüňde bolsa näbelli ykbal bilen gözleriňi açsaň näme edersiň? 1860-njy ýyl. Gadymy Merwiň töweregi. Eýran goşunynyň düzüminde türkmen topragyna gelen fransuz kapraly Žorž Anri Kulibef de Blokwil söweşde türkmenlere ýesir düşýär. Indi onuň öňünde diňe bir maksat bar: halas bolmak we Watanyna dolanmak. Emma onuň ýesirligi ýöne bir bendilik däl. Ony saklaýan Eýemyrat goňur Blokwili uly baýlygyň çeşmesi hasaplaýar. Şonuň üçin ýesiriň aýagyndaky gandal hem, töweregindäki howplar hem günsaýyn agyrlaşýar. Blokwil gaçmak üçin ýol gözleýär. Hat ýazyp, daşardan kömek soramaga synanyşýar. Emma her bir ädim onuň üçin täze howpy döredýär. Üstesine-de, onuň durmuşyna Akmaral atly syrly zenanyň girmegi wakalary has-da çylşyrymlaşdyrýar. Iki sany ýalňyz adamyň — biri ýesirlikde, beýlekisi geçmişiniň ýesirliginde ýaşaýan iki ynsanyň — arasynda sözden has güýçli bir ynsanperwerlik döreýär. Ýöne kiçijik bir obada dörän myş-myş uly howpa öwrülýär. Akmaral barada ýaýran töhmet Blokwiliň janyny howp astyna salýar. Indi onuň gaçmak islegi diňe azatlyk üçin däl, eýsem başgalaryň ykbalyny halas etmek üçin hem göreşe öwrülýär. «Keseki» — diňe bir taryhy roman däl. Bu eser uruş, ýesirlik, azatlyk, ynsanperwerlik, namys, töhmet we ynam barada çuňňur oýlandyrýan wakalar toplumydyr. Taryhyň sahypalarynda galan bir fransuz kapralynyň ykbaly arkaly XIX asyr türkmen durmuşyna, Merw söweşine we şol döwrüň adamlarynyň dünýäsine syýahat ediň. Bir ýesir. Bir gandal. Bir umyt. We azatlyga eltýän ýol…